1. Cwestiynau i'r Prif Weinidog – Senedd Cymru am ar 8 Hydref 2024.
8. Sut y bydd Llywodraeth Cymru yn mynd i'r afael â fepio ymhlith pobl ifanc fel rhan o'r addewid 'iechyd da'? OQ61646
Ni ddylai plant a phobl ifanc byth defnyddio fêps. Fel rhan o genhadaeth fy Llywodraeth i greu Cymru iachach, byddwn ni'n ymdrin â dibyniaeth ar nicotin yn ei holl ffurfiau ac yn cynllunio i fynd i'r afael â fepio ymhlith pobl ifanc trwy atal y cynhyrchion hyn rhag cael eu targedu'n fwriadol at blant.
Diolch. Mae fepio ymhlith pobl ifanc yn bryder cynyddol yn y Rhondda. Mae trigolion dig wedi cysylltu â mi ynglŷn â siop fêps newydd sydd wedi agor yn ddiweddar yn Nhreorci. Fel y rhan fwyaf o siopau fêps eraill, mae ganddi arwyddion wedi'u goleuo nad ydyn nhw'n cyd-fynd â'r stryd fawr. Mae ganddi arddangosfa ffrynt ddwbl o fêps lliwgar sy'n amlwg yn cael eu marchnata tuag at bobl ifanc, ac mae ar y prif lwybr i'r ysgolion cynradd a chyfun. Mae'r cynghorydd lleol Bob Harris wedi cyflwyno sylwadau i adran cynllunio a gorfodi cynllunio Cyngor Bwrdeistref Sirol Rhondda Cynon Taf, ond yn ofer. Fe wnaethon ni hefyd ymweld ag Ysgol Gyfun Treorci yr wythnos diwethaf, a fydd yn parhau â'r gwaith maen nhw'n ei wneud i godi ymwybyddiaeth o beryglon fepio i bobl ifanc.
Prif Weinidog, pa gamau eraill y gallwch chi eu cymryd i gefnogi cymunedau lleol drwy adolygiadau o ganiatadau cynllunio a rheoliadau ar gyfer siopau fepio, yn enwedig enwau siopau ac arwyddion? A beth arall y gellir ei wneud i fynd i'r afael â brandio a marchnata fêps, fel eu bod yn llai deniadol i bobl ifanc? Hefyd, oes cyfle i gynnal ymgyrch ehangach ledled Cymru ar draws ysgolion i fynd i'r afael â fepio ymhlith pobl ifanc mewn ffordd fwy grymus?
Wel, diolch yn fawr iawn. Rwy'n credu ein bod ni i gyd wedi ein syfrdanu gan y nifer fawr o siopau fêps; maen nhw i'w gweld yn ymddangos ym mhobman ac, yn amlwg, mae hwn yn faes lle mae angen i awdurdodau lleol ddefnyddio rheoliadau a chanllawiau cynllunio i sicrhau bod safleoedd newydd yn cydymffurfio â'r gyfraith. Ac rydyn ni'n awyddus iawn i sicrhau bod byrddau iechyd lleol yn chwarae rhan weithredol pan fydd cynghorau'n datblygu cynlluniau datblygu lleol. Felly, rwy'n credu ei bod yn bwysig iawn ein bod ni'n cael y cynlluniau datblygu lleol hynny'n gywir, fel bod y ceisiadau cynllunio, pan fyddan nhw'n cael eu cyflwyno, os nad ydyn nhw'n cydymffurfio â'r hyn rydyn ni eisiau ei weld—a fêps yw hyn, ond rwy'n credu y gallech chi ddweud yr un peth am siopau bwyd brys y tu allan i ysgolion a phethau, yr holl bethau hynny—. Rwy'n credu bod cyfle gwirioneddol i dynhau pethau yn hyn o beth, ac mae hynny'n sicr yn rhywbeth y bydd gennyf ddiddordeb mewn mynd ar ei drywydd.
O ran hysbysebu, edrychwch, mae'n amlwg bod yn rhaid i ni archwilio'r holl gamau blaengar i gyfyngu ar farchnata, hysbysebu, blasau, sydd yn amlwg wedi'u targedu'n at blant, ac mae'n frawychus gweld faint o blant sydd erbyn hyn yn defnyddio ac yn rhoi cynnig ar y cynhyrchion hynny. Rwy'n credu bod 18 y cant o bobl ifanc 11 i 17 oed wedi rhoi cynnig ar y cynhyrchion. Felly, mae llawer mwy i'w wneud yn hyn o beth ac, yn amlwg, bydd Llywodraeth y DU yn cyflwyno'r Bil tybaco a fêps hwnnw, a byddwn ni'n edrych i weld sut y gallwn ni weithio gyda nhw i ddatblygu'r agenda hon.
Diolch i'r Prif Weinidog.