1. Cwestiynau i'r Prif Weinidog – Senedd Cymru am ar 8 Hydref 2024.
7. Pa asesiad y mae Llywodraeth Cymru wedi'i wneud o effaith toriadau Llywodraeth y DU i'r lwfans tanwydd gaeaf ar bensiynwyr yn Nwyrain De Cymru? OQ61672
Rŷn ni’n ymwybodol fod llawer o bensiynwyr yng Nghymru yn pryderu am doriadau i’r lwfans tanwydd gaeaf. Rŷn ni’n parhau i gefnogi pobl er mwyn lleddfu pwysau ariannol ar draws y wlad, gan gynnwys yn Nwyrain De Cymru. Mae ein cynllun talebau tanwydd a’r gronfa cymorth dewisol ar gael i helpu pobl sydd mewn argyfwng gyda chostau tanwydd, ac mae’r rhaglen Cartrefi Clyd yn darparu ffyrdd o wella effeithlonrwydd ynni a lleihau biliau ynni yn y tymor hir.
Diolch, Gweinidog. Mae hyn yn peri pryder mawr i mi. Yn ystod yr wythnosau nesaf, bydd miloedd o bensiynwyr yng Nghymru yn dioddef brathiad oer y gaeaf oherwydd bod eu lwfans tanwydd gaeaf wedi cael ei dorri. Nawr, dyma ganlyniad garw diffyg ewyllys Llafur oherwydd, ie, y Torïaid ddechreuodd hyn—roedd eu creulondeb yn drychinebus—ond felly hefyd y mae'r dewis y mae Llafur yn ei wneud i lynu wrth eu hanwarineb. Oherwydd mae gorfodi pobl i ddioddef yr oerfel o dan y system breifat ddidrugaredd hon, sy'n moneteiddio'r gwres sydd ei angen arnom ni i aros yn fyw, gan atal eu modd o gysur, mae hynny'n anwarineb. Mae'n condemnio pobl i'r oerfel. Felly, Prif Weinidog, a wnaiff eich Llywodraeth wneud apêl munud olaf i Lywodraeth Keir Starmer i ailfeddwl y toriad creulon hwn? Dydych chi ddim eisiau i'ch Llywodraeth fod yn gysylltiedig ag ef 'does bosib.
Wel, diolch yn fawr iawn. Rwy'n ymwybodol y bydd llawer o bensiynwyr ledled Cymru a fydd yn bryderus iawn am y sefyllfa hon, a dyna pam ein bod ni'n awyddus iawn fel Llywodraeth, yn yr un modd ag y mae Llywodraeth y Deyrnas Unedig, i sicrhau y bydd pawb sy'n gymwys i gael taliadau tanwydd gaeaf yn manteisio ar y cyfle hwnnw. Fe allwn ni wneud yr hyn y gallwn ni yn Llywodraeth Cymru er mwyn cefnogi pobl, ac mae'n wych gweld bod cynghorau fel Cyngor Castell-nedd Port Talbot eisoes wedi helpu 2,100 o bobl i wneud cais am y credyd pensiwn hwnnw, sy'n golygu y byddan nhw wedyn yn gymwys. Felly, byddwn i'n annog pob cyngor ledled Cymru i yrru'r prosiect gwybodaeth hwnnw ymlaen er mwyn sicrhau bod pawb sy'n gymwys, a fydd yn cefnogi'r bobl dlotaf—. Rwy'n credu bod hynny'n bwysig, eu bod yn ymwybodol o hynny.
Rydyn ni fel Llywodraeth yn gwneud yr hyn y gallwn ni i gefnogi pobl gyda'u sefyllfa tanwydd gaeaf. Rydyn ni'n buddsoddi £30 miliwn y flwyddyn yn ein cynllun Nyth Cartrefi Cynnes, ac rydyn ni hefyd wedi rhoi mwy na £5.6 miliwn o gyllid ar gyfer taleb tanwydd cenedlaethol a chronfa wres, ac mae hynny wedi bod ar waith ers 2022. Felly, rydyn ni'n gwneud yr hyn y gallwn ni yn hyn o beth, ond rwy'n credu ei bod hi hefyd yn bwysig i bensiynwyr nodi—. Rwy'n siarad â llawer o bobl ac roeddwn i'n siarad ag un ohonyn nhw a gododd y mater hwn gyda mi dros y penwythnos, a doedd dim syniad ganddo y byddai ei bensiwn eleni, mewn gwirionedd, yn cynyddu 8.5 y cant, ac y byddai'n codi 4 y cant y flwyddyn nesaf. Felly, at ei gilydd, bydd yn well ei fyd ond, yn amlwg, mae llawer o sensitifrwydd ynghylch hyn, a llawer o bobl sy'n poeni am y sefyllfa.
Yn olaf, cwestiwn 8. Buffy Williams.