Yr eitem nesaf fydd y cynnig cydsyniad deddfwriaethol ar y Bil Diogelu Data a Gwybodaeth Ddigidol, a'r Ysgrifennydd Cabinet dros yr Economi, Ynni a’r Gymraeg sy'n gwneud y cynnig yma. Jeremy Miles. 

Cynnig NDM8579 Jeremy Miles

Cynnig bod y Senedd, yn unol â Rheol Sefydlog 29.6, yn cytuno y dylai Senedd y DU ystyried y darpariaethau yn y Bil Diogelu Data a Gwybodaeth Ddigidol i’r graddau y maent yn dod o fewn cymhwysedd deddfwriaethol y Senedd.

Cynigiwyd y cynnig.

Diolch, Llywydd. Rwy'n gwneud y cynnig ynghylch Bil Diogelu Data a Gwybodaeth Ddigidol Llywodraeth y Deyrnas Unedig, a'r ffordd y caiff y darpariaethau hynny sydd o fewn cymhwysedd deddfwriaethol y Senedd eu hystyried.

Drwy'r Bil hwn, mae Llywodraeth y Deyrnas Unedig yn ceisio diweddaru a symleiddio fframwaith diogelu data'r Deyrnas Unedig, gyda'r nod o leihau beichiau ar sefydliadau, gan gynnal, ar yr un pryd, safonau diogelu data uchel. Er bod mwyafrif helaeth o'r Bil hwn wedi ei gadw yn ôl, mae sawl darpariaeth o fewn cymhwysedd deddfwriaethol y Senedd, fel sydd wedi ei nodi ym mhedwar memorandwm y Bil. Hoffwn i ddiolch i'r pwyllgorau am ystyried y memoranda hynny sydd wedi eu gosod.

Llywydd, er fy mod yn croesawu'r Bil yn gyffredinol, mae'n siomedig ein bod mewn sefyllfa lle mae Llywodraeth y DU yn ceisio caniatâd gan y Senedd i Fil sy'n methu ag adlewyrchu cymhwysedd deddfwriaethol y Senedd ac egwyddorion datganoli. Mae hyn yn arbennig o siomedig o ystyried y cytundeb a rennir yn fras ar yr angen am gydsyniad y Senedd. Dangosir y methiannau hyn yn glir yn y dull y mae Llywodraeth y DU wedi'i fabwysiadu mewn cysylltiad â'r darpariaethau cofrestr asedau tanddaearol cenedlaethol newydd, a gyflwynwyd i'r Bil fis Tachwedd diwethaf.

Fel y maent wedi'u drafftio ar hyn o bryd, bydd y darpariaethau hyn yn tynnu pwerau deddfu presennol o dan adran 79 o'r Ddeddf Ffyrdd Newydd a Gwaith Stryd 1991 oddi wrth Weinidogion Cymru, gan eu trosglwyddo i Weinidogion y DU. Rwy'n siŵr y bydd yr Aelodau'n cytuno bod dileu swyddogaeth weithredol ddatganoledig gan Weinidogion Cymru heb gytundeb, a heb hyd yn oed ymgynghori ymlaen llaw, yn gwbl annerbyniol.

Mae trafodaethau helaeth ar lefel weinidogol a swyddogol wedi'u cynnal gyda Llywodraeth y DU ers cyflwyno'r Bil, gan ganolbwyntio ar oblygiadau datganoledig nifer o ddarpariaethau o fewn y Bil. Daeth y trafodaethau hyn i ben gyda'r cynnig gan Lywodraeth y DU o becyn o welliannau wedi'u targedu y byddent yn barod i'w gwneud, pe bai Gweinidogion Cymru yn eu hystyried yn ddigonol i argymell caniatâd i'r Bil yn y Senedd.

Fodd bynnag, roedd y gwelliannau arfaethedig yn cynrychioli diffyg symud sylweddol ar ran Llywodraeth y DU y tu hwnt i'r cynnig o nifer o ddarpariaethau ymgynghori, gyda Llywodraeth y DU yn parhau i gymryd pwerau mewn meysydd datganoledig heb hyd yn oed rôl gydsynio i Weinidogion Cymru. Rydym wedi dadlau ers tro yn erbyn awgrym Llywodraeth y DU i ddefnyddio darpariaethau ymgynghori fel math o ddiogelwch cyfansoddiadol yn lle mecanweithiau cydsynio rhwymol. Dyma safbwynt Llywodraeth Cymru a'r Senedd yn gyson mewn cysylltiad â Biliau'r DU—safbwynt, gyda llaw, y mae Llywodraeth y DU yn ymwybodol iawn ohoni. O'r herwydd, nid yw Gweinidogion o'r farn bod y gwelliannau arfaethedig yn ddigonol ac felly nid ydym yn argymell cydsyniad y Senedd i'r Bil hwn, fel y nodir yn y memorandwm cydsyniad deddfwriaethol atodol a osodwyd ar 16 Ebrill. At hynny, mae'r dull a fabwysiadodd Llywodraeth y DU i gyflwyno'r gwelliannau arfaethedig hyn fel pecyn terfynol ar yr amod bod yn rhaid i ni gytuno i bob un ohonynt, neu fel arall ni fyddai'r un ohonynt yn cael eu cyflwyno, yn gwbl groes i egwyddor confensiwn Sewel na ddylai Senedd y DU ddeddfu ar faterion datganoledig heb gydsyniad y Senedd.

Rydym o'r farn y dylid gwneud gwelliannau i'r Bil hwn sy'n parchu cymhwysedd deddfwriaethol y Senedd, sy'n parchu swyddogaethau gweithredol Gweinidogion Cymru, ac sy'n adlewyrchu'r setliad datganoli presennol. Rydym hefyd wedi bod yn gwbl glir gyda Llywodraeth y DU y dylid gwneud gwelliannau i'r darpariaethau cofrestr asedau tanddaearol cenedlaethol newydd i sicrhau bod Gweinidogion Cymru yn cadw eu pwerau deddfu presennol.

Er nad yw dull presennol Llywodraeth y DU yn gyson ag egwyddorion datganoli, mae amser o hyd i Lywodraeth y DU fynd i'r afael â'n pryderon er mwyn i ni gael datrysiad boddhaol a fyddai wedyn yn ein galluogi i argymell cydsyniad y Senedd i'r Bil. Pe bai hyn yn digwydd, byddai angen i'r Senedd ystyried gwelliannau pellach i'r Bil. Fodd bynnag, Llywydd, hyd nes y daw'r amser hwnnw, rwy'n argymell i'r Aelodau nad ydynt yn cefnogi'r cynnig. 

Cadeirydd y Pwyllgor Deddfwriaeth, Cyfiawnder a'r Cyfansoddiad nawr—Sarah Murphy.  

Diolch, Llywydd. Yn ystod tair o'r pedair wythnos diwethaf, rwyf wedi siarad yn y Siambr hon fel Cadeirydd y Pwyllgor Deddfwriaeth, Cyfiawnder a'r Cyfansoddiad yn ystod dadleuon cydsyniad deddfwriaethol, dyna ichi i ba raddau y mae Biliau yn Senedd y DU yn gwneud darpariaeth mewn meysydd datganoledig. Mae fy mhwyllgor wedi adrodd deirgwaith ar y memoranda cydsyniad deddfwriaethol a osodwyd gan Lywodraeth Cymru ar y Bil Diogelu Data a Gwybodaeth Ddigidol. Gosodwyd ein trydydd adroddiad, ar femorandwm Rhif 4, brynhawn ddoe, gan mai dim ond ychydig dros bythefnos yn ôl y gosodwyd y memorandwm ei hun. Bydd fy sylwadau y prynhawn yma yn canolbwyntio ar dri mater allweddol, a byddaf yn cyfeirio Aelodau ac eraill at ein hadroddiadau am ein barn a'n hargymhellion manwl.

Felly, mae sawl darpariaeth yn y Bil yn rhoi pwerau deddfu eang i'r Ysgrifennydd Gwladol yn unig, pwerau y gellir eu harfer mewn meysydd datganoledig. Mae eraill hefyd yn rhoi pwerau dirprwyedig cyfatebol i'r Trysorlys. Felly, yn ein hadroddiad diweddaraf, rydym wedi datgan ein cytundeb gyda'r Ysgrifennydd Cabinet bod dirprwyo o'r fath yn amhriodol. Er enghraifft, mae cymalau 86 ac 88 yn rhoi pwerau deddfu eang amrywiol i'r Ysgrifennydd Gwladol a'r Trysorlys mewn cysylltiad â data cwsmeriaid a data busnes. Gallai rheoliadau o'r fath ddal amrywiaeth eang o fusnesau, a bod â'r potensial i effeithio ar feysydd datganoledig, heb unrhyw rôl i Weinidogion Cymru. Diolch i'r Ysgrifennydd Cabinet am rannu gyda ni y llythyrau a gyfnewidiwyd rhwng Llywodraeth Cymru a'r DU. Yn un o'r llythyrau, mae'r Gweinidog Gwladol yn ei gwneud yn glir bod Llywodraeth y DU yn bwriadu i'r Bil alluogi defnydd gwell o ddata ym maes iechyd a gofal cymdeithasol. Mae hyn yn hynod o arwyddocaol. Rhestrwyd data iechyd a gofal cymdeithasol yn y llythyr hwn, a dim ond ddoe y daeth ein pwyllgor yn ymwybodol ohono.

Mae gennym bryderon cryf am amhriodoldeb cyfansoddiadol y darpariaethau yn y Bil ar gyfer cofrestr asedau tanddaearol genedlaethol. Trwy'r darpariaethau hyn, trosglwyddir pwerau a ddirprwywyd ar hyn o bryd i Weinidogion Cymru o dan adran 79 o Ddeddf Ffyrdd Newydd a Gwaith Stryd 1991 i'r Ysgrifennydd Gwladol, heb unrhyw gyfiawnhad rhesymol. Mae hyn yn golygu dileu swyddogaeth weithredol ddatganoledig. Felly, fel pwyllgor, rydym yn cefnogi barn yr Ysgrifennydd Cabinet fod hwn yn gwrthdroi datganoli'n amhriodol. Yn ogystal, bydd y darpariaethau hyn yn y Bil ar gyfer cofrestr asedau tanddaearol genedlaethol yn arwain at ddirymu deddfwriaeth a gymeradwywyd gan y Senedd ar ffurf Rheoliadau Gwaith Stryd (Cofnodion) (Cymru) 2005. Unwaith eto, mae hyn yn anaddas.

Gan symud ymlaen at y darpariaethau yn y Bil sy'n ymwneud â gwasanaethau dilysu digidol, ar y pwynt hwn, rydym yn anghytuno â safbwynt Llywodraeth Cymru o ran y gofyniad am gydsyniad deddfwriaethol mewn cysylltiad â'r darpariaethau hyn. Ond mae hyn oherwydd, er bod Llywodraeth Cymru wedi mynnu o'r dechrau bod angen caniatâd ar gyfer y darpariaethau hyn, ym mis Chwefror, ysgrifennodd Llywodraeth y DU at Lywodraeth Cymru yn nodi bod ei nodyn cyfarwyddyd datganoli ei hun yn cynghori y dylid ceisio cydsyniad pan fo darpariaethau yn un o'i Biliau yn rhoi neu yn gorfodi swyddogaethau a gedwir yn ôl ar awdurdod datganoledig yng Nghymru. Mae hyn er gwaethaf barn gyffredinol Llywodraeth y DU bod y swyddogaethau hyn yn rhai a gedwir yn ôl a'i chydnabyddiaeth ei hun nad yw Rheolau Sefydlog y Senedd yn ymdrin â sefyllfaoedd lle rhoddir swyddogaethau a gedwir yn ôl ar awdurdodau datganoledig Cymru. Fodd bynnag, nid yw nodyn cyfarwyddyd datganoli Llywodraeth y DU yn ystyriaeth berthnasol at ddiben y profion yn Rheolau Sefydlog y Senedd. Gosodir Memorandwm Rhif 4 gerbron y Senedd o dan Reol Sefydlog 29, ac mae'n ddryslyd i gyfeirio at feini prawf nad ydynt yn berthnasol i broses cydsyniad deddfwriaethol y Senedd. Pan ofynnom i Lywodraeth Cymru am ei barn ar y gwahanol feini prawf a dulliau o gydsyniad deddfwriaethol y mae'n ymddangos eu bod yn cael eu cymhwyso gan Lywodraeth y DU, Llywodraeth Cymru a Rheolau Sefydlog y Senedd, dywedwyd wrthym fod Llywodraeth Cymru wedi ymrwymo i gonfensiwn Sewel, ac, er bod y datganiad hwnnw i'w groesawu, nid yw'n rhoi'r esboniad yr oeddem yn gobeithio amdano. Mae'r meini prawf yn dal i fod yn anhryloyw.

Yn olaf, mae rhai pryderon bod y Bil yn peri risg i benderfyniad digonolrwydd data cyfredol y DU. Dyma'r llwybr lle mae'r DU a'r Undeb Ewropeaidd yn rhannu data. Byddai ei golli yn arwain at oblygiadau penodol i fasnach Cymru a'r economi. Ym memorandwm Rhif 4, mae'r Ysgrifennydd Cabinet yn datgan y gallai'r Bil sbarduno adolygiad o statws digonolrwydd data'r DU gan y Comisiwn Ewropeaidd, a bod ganddo'r potensial i arwain at her gyfreithiol yn Llys Cyfiawnder yr Undeb Ewropeaidd. Fel y pwyllgor sy'n gyfrifol am rwymedigaethau rhyngwladol, mae'r safbwyntiau hyn yn amlwg ac yn peri pryder, felly rydym wedi gofyn i'r Ysgrifennydd Cabinet a allai o bosibl ddarparu mwy o fanylion, os gwelwch yn dda.

Yn ein hadroddiad diweddaraf, a osodwyd ddoe, gwnaethom hefyd ofyn i'r Ysgrifennydd Cabinet gadarnhau a yw Llywodraeth Cymru o'r farn y dylai'r Bil gael goblygiadau ar gyfer trefniadau rhyngwladol eraill, fel pont ddata'r DU-yr Unol Daleithiau, a sefydlwyd yn 2023. Ac yn olaf, hoffwn nodi bod yr Ysgrifennydd Cabinet wedi cynnig mwy o fanylion yn ei sylwadau agoriadol, a hefyd diolch i chi am eich gohebiaeth fanwl gyda'r pwyllgor drwyddi draw. Diolch.

Cadeirydd y Pwyllgor Diwylliant, Cyfathrebu, y Gymraeg, Chwaraeon a Chysylltiadau Rhyngwladol, Delyth Jewell.

Diolch, Llywydd. Llywydd, mae fy mhwyllgor wedi adrodd ar y tri memorandwm cyntaf ar gyfer y Bil hwn. Mae'n destun gofid bod yn rhaid i mi adrodd bod amser wedi bod yn ein herbyn ac nad oeddem mewn sefyllfa i ystyried y pedwerydd memorandwm ar gyfer Bil y DU sydd â goblygiadau difrifol a phellgyrhaeddol i Gymru. Yn ystod ein gwaith craffu ar Fil Protocol Gogledd Iwerddon, bydd yr Aelodau'n cofio bod tri o bwyllgorau'r Senedd hon, gan gynnwys fy un i, yn pwysleisio'r angen am ddigon o amser i graffu ar Gynnig Cydsyniad Deddfwriaethol, yn enwedig y rhai sydd â goblygiadau difrifol. Nawr, o ystyried yr amser cyfyngedig a oedd ar gael, roeddem yn disgwyl i Lywodraeth Cymru fabwysiadu dull tryloyw a manwl o ymdrin â memoranda i'n cynorthwyo yn ein gwaith. Rydym eisoes wedi clywed bod ein pwyllgorau, ddoe, yn dal i dderbyn gwybodaeth newydd gan Lywodraeth Cymru. Er ein bod yn croesawu'r ymdrech hon i rannu gwybodaeth, mae'r sefyllfa hon yn enghraifft o gyfyngiadau'r broses gydsynio. Mae'r ffaith ein bod yn derbyn gwybodaeth ar ddiwrnod dyddiad cau'r adroddiad a diwrnod cyn y ddadl heddiw yn sicr yn annymunol i bob un ohonom.

Nawr, o'r dechrau, mae Llywodraeth Cymru wedi rhybuddio bod y Bil hwn yn peri risg i benderfyniad digonolrwydd data'r DU ar gyfer yr UE. Mae'r statws hanfodol hwn, a sicrhawyd yn ystod Brexit, yn sicrhau llif data am ddim rhwng y DU a'r UE tan fis Mehefin 2025. Nawr, er y gallai Llywodraeth Cymru fod wedi darparu asesiad manylach ar y cyfrifiad hwn, fel pwyllgor, rydym serch hynny yn cymryd unrhyw bryderon a godwyd am gysylltiadau rhwng y DU a'r UE o ddifrif. Mae'r ffaith bod Llywodraeth Cymru yn credu y gallai'r Bil effeithio'n andwyol ar ddigonolrwydd data'r DU ac, yn ehangach, ar gysylltiadau rhwng yr UE a'r DU a Chymru, yn rhywbeth a ddylai fod o bwys i bob un ohonom.

Llywydd, mae fy mhwyllgor yn flaenllaw yng ngwaith y Senedd wrth ddod o hyd i bwyntiau pwysig ein perthynas ar ôl Brexit â'r UE. Nawr, rydym wir yn croesawu cynnwys dadansoddiadau o'r cytundeb masnach a chydweithredu ar gyfer y Bil hwn, ymrwymiad a sicrhawyd gan adroddiad blynyddol cysylltiadau rhyngwladol ein pwyllgor, ac sydd wedi dwyn ffrwyth ar gyfer y Bil hwn. Ddiwedd mis Mawrth, nododd y Comisiwn Ewropeaidd bedwar darn o ddeddfwriaeth y DU a allai effeithio ar weithrediad y cytundeb masnach a chydweithredu. Mae'r Bil hwn yn un ohonynt, ochr yn ochr â Deddf Cyfraith yr UE a Ddargedwir (Dirymu a Diwygio) 2023 a Deddf Diogelwch Rwanda (Lloches a Mewnfudo) 2024. Nawr, pe bai'r canlyniad a ddisgrifiwyd gan yr Ysgrifennydd Cabinet ym memorandwm Rhif 4 yn cael ei wireddu—pe bai'n cael ei wireddu—gallai'r Bil hwn arwain at gamau gorfodi gan Lys Cyfiawnder yr UE. Byddai hynny'n anochel yn cynrychioli rhwystr difrifol yn y berthynas rhwng y DU a'r UE.

Yn ystod ein hymchwiliad Cymru-Iwerddon, dywedodd ein ffrindiau a'n cymdogion yn Iwerddon wrthym fod cydweithredu yn anochel; mae cydweithredu yn rhinwedd a byddai ei gymryd yn ganiataol yn rhywbeth peryglus iawn. Llywydd, mae ein ffiniau mandyllog yn mynnu cydweithrediad, cyfres o ddewisiadau i adeiladu ac i feithrin cysylltiadau cadarnhaol. Fel y dywedodd R.F. Kuang:

'Nid yw hanes yn dapestri a wnaed ymlaen llaw y mae'n rhaid i ni ddioddef, byd caeedig heb unrhyw allanfa. Gallwn ei ffurfio. Gallwn ei wneud. Mae ond angen inni ddewis ei wneud.'   

Buom yn trafod y Bil hwn yn y pwyllgor, ond cefais fy rhybuddio yn gryf ynghylch ychwanegu'r gofrestr asedau tanddaearol genedlaethol ato, ac, mae'n debyg, cafodd ei hychwanegu ar y funud olaf un, felly roeddwn ychydig yn bryderus ynghylch pam y cafodd ei hychwanegu ar y funud olaf. Rwyf wedi ysgrifennu, ond nid wyf wedi cael ymateb gan yr Ysgrifennydd Gwladol.

Mae ein seilwaith tanddaearol yn hynod gymhleth. Mae'n gymysgedd o bibellau a cheblau, ac fe'i rheolir gan dimau gwaith stryd awdurdodau lleol, felly, os oes angen gwneud unrhyw waith cynnal a chadw, mae angen ymgynghori â nhw. Rwy'n gwybod, o fod yn aelod cabinet blaenorol dros briffyrdd, pa mor bwysig ydyw a pha mor bwysig yw cadw'r hawl honno i gymryd rhan mewn penderfyniadau cynllunio ynghylch yr hyn sydd o dan ddaear ein ffyrdd. Felly, rwy'n poeni'n fawr am hyn, y byddai hyn yn mynd at yr Ysgrifennydd Gwladol ar gyfer cyflwyno a gwneud penderfyniadau pan, mewn gwirionedd, y dylai fod ar lefel leol iawn, y gofrestr asedau tanddaearol. Ac rwy'n gwybod bod ei angen arnom, ond mae angen i ni fod yn rhan o bob rhan o'r broses benderfynu, felly byddwn yn eich annog i bleidleisio yn erbyn hyn. Diolch.

Yr Ysgrifennydd Cabinet i ymateb.

Diolch, Llywydd, a diolch i'r rheini sydd wedi cyfrannu i'r ddadl, yn cynnwys ar ran y pwyllgorau maen nhw'n eu cadeirio.

Yn y cyfraniadau, mae'r Aelodau wedi gofyn am eglurder a mewnwelediad ar ddau neu dri maes arall, felly rwy'n gobeithio y bydd yn cynorthwyo'r Aelodau i wybod mai ein barn ni yw bod nifer o ddarpariaethau yn y Bil, mewn cysylltiad â digonolrwydd data, yn cael eu hystyried yn heriol ac yn meddu ar botensial o adolygiad gan y comisiwn, neu her gyfreithiol yn Llys Cyfiawnder yr Undeb Ewropeaidd, ac mae'r rhain yn cynnwys darpariaethau y gwelir eu bod yn gwanhau annibyniaeth y Comisiynydd Gwybodaeth ac yn tanseilio hawliau unigol. At y pwynt yr oedd Sarah Murphy yn ei wneud yn ei chyfraniad, mae'r Bil yn diwygio'r diffiniad statudol o ddata personol, ac mae perygl y bydd ystod ehangach o ddata iechyd a gofal cymdeithasol yn cael ei gynnwys yng nghwmpas cytundebau masnach rydd. Rydym yn ymwybodol, fel y gŵyr yr Aelodau yn gyffredinol, fod gan y cyhoedd bryderon ynghylch defnyddio eu data iechyd ar gyfer unrhyw beth heblaw darparu gofal, a gallai cynnwys y data hwn o fewn cwmpas cytundebau masnach rydd danseilio ymddiriedaeth y cyhoedd. Wrth gwrs, mae'n hanfodol bod y DU yn cadw ei digonolrwydd data, ac rwy'n siomedig fod Llywodraeth y DU yn gwrthod yn barhaus i rannu copi o'i hasesiad risg ar hyn gyda ni, a byddaf yn adolygu canfyddiad ymchwiliad Pwyllgor Materion Ewropeaidd Tŷ'r Arglwyddi ar ddigonolrwydd data, sydd ar y gweill ar hyn o bryd.

Gofynnodd Delyth Jewell am lefel y manylion mewn Cynigion Cydsyniad Deddfwriaethol, ac rwy'n derbyn bod tensiwn clir rhwng y cyfnod o bythefnos y mae'r Rheol Sefydlog yn ei ddarparu ar gyfer darparu Cynigion Cydsyniad Deddfwriaethol a'r gallu i ddarparu gwybodaeth fanwl. Credaf fod hyn yn nodwedd o'r ffaith bod y broses y mae'n rhaid i ni ymateb iddi yn un nad yw'n ystyried amserlen y Senedd ei hun ac sy'n canolbwyntio'n fawr ar weithgareddau yn Senedd y DU. Roedd yr enghraifft a roddodd Carolyn Thomas yn berthnasol iawn i hyn, mewn cysylltiaid â darpariaethau'r gofrestr asedau tanddaearol. Ni wnaeth Llywodraeth y DU ein gwneud yn ymwybodol o'r newidiadau arfaethedig i bwerau Gweinidogion Cymru tan y diwrnod cyn i'r gwelliannau gael eu cyflwyno yn y Senedd, sydd, rwy'n siŵr y bydd Aelodau'n cytuno, yn hynod siomedig.

Yn olaf, ar y pwynt a wnaeth Delyth Jewell mewn cysylltiad â'r Cytundeb Masnach a Chydweithredu a'r asesiad y mae ei phwyllgor wedi'i gynnal, yn fy marn i, mae'r newidiadau i fframwaith diogelu data'r DU a gynigiwyd yn y Bil, fel y'i drafftiwyd, yn annhebygol o effeithio ar gydymffurfiad y DU â'r Cytundeb Masnach a Chydweithredu oherwydd bod y darpariaethau diogelu data ar y cyfan yn eang ac yn rhai lefel uchel. Fodd bynnag, rydym yn pryderu y gallai'r Bil nodi dechrau ymwahanu'r DU oddi wrth y drefn diogelu data sydd ar waith ar hyn o bryd ledled yr UE ac, mae'n afraid dweud byddai gan hyn y potensial i danseilio darpariaethau diogelu data yn y Cytundeb Masnach a Chydweithredu ar draws ystod o feysydd polisi a'r golled bosibl o ddigonolrwydd data o ganlyniad. Felly, Llywydd, i gloi, o ganlyniad i'r pryderon cyfansoddiadol ynghylch y Bil, gofynnaf i Aelodau'r Senedd beidio â chydsynio i'r Bil hwn. Diolch yn fawr.

Y cwestiwn yw: a ddylid derbyn cynnig? A oes unrhyw Aelod yn gwrthwynebu? [Gwrthwynebiad.] Oes, mae yna wrthwynebiad. Felly, fe fyddwn ni yn gohirio'r bleidlais tan nawr. Ac os nad oes yna dri Aelod yn dymuno i fi ganu'r gloch, awn ni'n syth i'r bleidlais y prynhawn yma. 

Gohiriwyd y pleidleisio tan y cyfnod pleidleisio.