Diolch yn fawr, James, ac rwy'n gwybod mai maes yw hwn, fel y dywedais i, y mae gennych ddiddordeb mawr ynddo ac rydych wedi gweithio arno dros y blynyddoedd diwethaf, yn arbennig. Edrychaf ymlaen at weithio gyda chi ar y gwaith rydych yn ei wneud ar y Bil. Edrychwn ymlaen at weld mwy o fanylion am y cynigion, a gwn eich bod wedi fy ngwahodd i ford gron. Felly, rwy'n edrych ymlaen at ddod i'r ford gron honno maes o law.

Yn sicr, rwyf wedi clywed eich sylwadau yn flaenorol ar CAMHS a'ch pryderon ynghylch yr ail apwyntiad hwnnw, yr apwyntiad dilynol. Rydym yn darparu £13.6 miliwn eleni i gefnogi ysgolion i weithredu'r dull ysgol gyfan o ymdrin ag iechyd meddwl a llesiant. Bydd hyn yn galluogi ysgolion i ehangu a gwella cwnsela ysgolion, darparu ymyraethau llesiant cyffredinol a phenodol, a hyfforddi staff ysgolion ar lesiant. Bydd hefyd yn galluogi cymorth parhaus i fyrddau iechyd, i ddarparu addysg CAMHS ar draws Cymru, gydag ymarferwyr iechyd meddwl penodol ar gael mewn ysgolion, gan ddarparu ymgynghoriadau, cyswllt, cyngor a hyfforddiant. Felly, wyddoch chi, mae yna bethau rydyn ni'n edrych arnyn nhw, ac rwy'n edrych ymlaen at barhau i weithio gyda chi ar hyn.