Diolch am y cwestiwn yna, Vikki, ac rwy'n gwerthfawrogi eich sylwadau caredig ar y dechrau. Diolch yn fawr. Rydych chi'n hollol iawn: mae presgripsiynu cymdeithasol yn bwysig iawn. Mae wedi'i blethu i wead yr hyn y mae Llywodraeth Cymru yn ei wneud o ran grymuso pobl a chymunedau. Mae'n allweddol mewn gwirionedd. Rwy'n hapus iawn i ymweld ag unrhyw le y credwch a fyddai'n ddefnyddiol iawn i mi ddysgu ohono a'i weld, felly edrychaf ymlaen at wneud hynny gyda chi.

Rydym yn glir o fewn y strategaeth hon ar y rôl gwbl hanfodol y bydd y trydydd sector yn ei chwarae wrth ei weithredu. Rydym wedi datblygu'r strategaeth gyda'r ddealltwriaeth y bydd angen bod yn ymwybodol o osod blaenoriaethau, sicrhau'r defnydd gorau o adnoddau presennol a chyfle i fod yn glir am yr hyn y gallwn ei gyflawni'n realistig. A dim ond trwy weithio gyda'n gilydd y gallwn wneud hynny, a chydweithio â'r trydydd sector. Felly, maen nhw'n bartner pwysig ac rwy'n gobeithio y byddwch chi'n eu hannog i gymryd rhan yn yr ymgynghoriad sy'n digwydd, sy'n dod i ben ar 11 Mehefin, oherwydd mae'n bwysig iawn ein bod ni'n cael cymaint o leisiau â phosib drwy'r ymgynghoriad hwnnw. Diolch yn fawr.