3. A wnaiff y Prif Weinidog roi'r wybodaeth ddiweddaraf am ysbyty cymuned gogledd Sir Ddinbych yn y Rhyl? OQ61001

Gwnaf, diolch. Mae'r bwrdd iechyd wrthi'n adolygu ei gynigion ar gyfer safle Ysbyty Brenhinol Alexandra ar hyn o bryd, mewn partneriaeth â rhanddeiliaid lleol. Disgwylir i'r cynigion gynnwys uned mân anafiadau, gwelyau gofal canolraddol a gofal integredig. Dylai'r achos busnes gael ei gyflwyno i Lywodraeth Cymru ei ystyried pan fydd yn barod.

Diolch yn fawr iawn am eich diweddariad y prynhawn yma, Prif Weinidog. Rwy'n credu efallai nad yw'r cynnydd tybiedig a'r cynnydd gwirioneddol sy'n cael ei deimlo gan fy etholwyr yn cyfateb yma, oherwydd y ffaith amdani yw bod fy etholwyr wedi bod yn aros dros 10 mlynedd i'r ysbyty cymuned hwn gael ei adeiladu yn y Rhyl, a ystyriwyd ers amser maith fel yr ateb ar gyfer trin rhai o'r problemau mwyaf difrifol yn adran damweiniau ac achosion brys Glan Clwyd, sef yr ysbyty sy'n perfformio waethaf yn y bwrdd iechyd sy'n perfformio waethaf.

Chi oedd y Gweinidog iechyd pan wnaethoch chi gyhoeddi gyntaf y byddai £40 miliwn yn mynd tuag at ysbyty cymuned gogledd Sir Ddinbych, ac er y gallaf werthfawrogi'r ffaith bod costau wedi codi'n sylweddol ers hynny, rwy'n credu y gallwch chi fynd dwy ffordd gyda hyn, Prif Weinidog. Gallwch chi naill ai fod y Prif Weinidog diweddaraf mewn llinell o Brif Weinidogion sy'n tyfu'n barhaus i fethu â chyflawni'r prosiect hwn, y dywedodd eich rhagflaenydd uniongyrchol ei fod yn gresynu na chafodd yr ysbyty hwn ei ddarparu yn ystod ei amser yn y swydd, neu gallech chi fod y Prif Weinidog i gwblhau'r prosiect hwn o'r diwedd. Pa un fydd hi? Os rywsut mai'r olaf fydd hi, yna beth fyddai eich neges i'm hetholwyr yn Nyffryn Clwyd sydd wedi bod yn aros yn rhy hir i hyn ddigwydd?

Daeth y Dirprwy Lywydd (David Rees) i’r Gadair.

Mae'n destun gofid, wrth gwrs, nad yw'r cynnig i ddefnyddio safle Ysbyty Brenhinol Alexandra, y mae cefnogaeth eang iddo, wedi dwyn ffrwyth eto. Pan gymeradwyais i gynigion rai blynyddoedd yn ôl, credwyd i ddechrau y byddai'n costio tua £40 miliwn. Cynyddodd hynny wedyn i £100 miliwn. Ac mae'n werth ystyried nid yn unig y cynnydd sylweddol o ran cost y prosiect, ond y ffaith bod hynny i gyd wedi digwydd yn erbyn cefndir lle mae ein gallu cyfalaf o fewn Llywodraeth Cymru ac o fewn GIG Cymru wedi lleihau'n olynol. A dweud y gwir, rydym ni wedi gwneud yn waeth o ran cyfalaf nag yr ydym ni wedi ei wneud o ran refeniw yn yr ychydig rowndiau cyllideb diwethaf, felly rydym ni wir wedi ein gwasgu.

Yr hyn sydd wedi digwydd nawr yw bod y cynllun wedi cael ei flaenoriaethu gan y bwrdd cynllunio rhanbarthol, gyda phartneriaid eraill—y gwasanaeth iechyd, yn gweithio gyda phartneriaid lleol eraill—i edrych ar ddyluniad a ddylai weithio. Mater i'r partneriaid hynny yw llunio achos busnes llawn a all ddod i'r Llywodraeth i'w gymeradwyo. Hoffwn yn fawr iawn petawn ni'n gallu cael achos busnes y gallwn ni fuddsoddi ynddo a gweld darpariaeth ynddo hefyd. Bydd hynny'n gwneud gwahaniaeth gwirioneddol i wahanol randdeiliaid ac etholwyr, nid yn unig yn etholaeth yr Aelod ond yn y rhanbarth ehangach. Ond mae angen i'r achos busnes gael ei ddarparu'n gadarn i ni, gyda chostau manwl o'i gwmpas, ac yna rwyf eisiau gallu rhoi sêl bendith i hynny. Yn wir, ysgrifennodd Ysgrifennydd y Cabinet dros Iechyd a Gwasanaethau Cymdeithasol at y Cynghorydd Joan Butterfield, cadeirydd y pwyllgor craffu partneriaethau, yn ddiweddar i roi'r wybodaeth ddiweddaraf ar hyd y llinellau hynny.